Университетіміз академиялық мобильдік жүйе бойынша  студенттерін шетелге жіберуде. Оған дәлел: Филология, әдебиеттану және әлем тілдері мен Шығыстану факультетінің  студенттері «Мевлана» бағдарламасымен Анкара қаласының Гази университетінде тәжірибе алмасып, білім алуда. Түркі қандастарымыз студенттерді құшақ жайып, жылы қарсы алыпты. Молдажанов Ербол, Сансызбай Балжан, Абдуллаева Дәметкен, Талап Шерхан сынды студенттер барған күннен-ақ ерекше белсенділіктерімен көзге түсе бастапты. 12-13 наурыз аралығында Hacettepr университетінің ұйымдастыруымен «Жібек жолының бойында орналасқан Түркі халықтарының экономикалық іс бірлігі» атты конференция өтті. Конференция мақсаты: болашақта күш біріктіре отырып, ары қарай экономикалық дамудың жолын іздеу, дағдарысқа жол бермеу. Жиынға Түркия, Қазақстан, Өзбекстан, Кипр, Қырғызстан, Түркіменстан, Азербайжан елдері делегаттары, сонымен қатар біздің студенттеріміз де атсалысқан.

Елімізден ҚР Түркиядағы Төтенше және өкілетті елшісі Жансейіт Түймебаев барып, аталған елдер арасындағы достық қатынасты басып айтып, Ұлы тарихтың куәсі болып жатқан Ұлы Жібек Жолының экономикалық дамудағы маңызы қаншалықты екенін баяндап, елімізде өтетін әз Наурыз мейрамын тойлауға шақырыпты. Hacettepr университетінде де қазақстандық студент-магистранттар бар екен. Бұл студенттер қаржы, экономика саласының өсіп-өркендеуіне қатысты, әлемді шулатқан АҚШ долларының бағамының өсуі туралы өз ұсыныстарын білдіріп, баяндама оқыпты. Конференция сұрақ-жауаппен жалғасып, қатысушыларға арнайы сертификат табысталып, құрмет білдірілген. Шетте жүрсе де, өз қабілеттерін ұштап жүрген студенттеріміз алдағы уақытта да осындай белсенділік танытып, еліміздің мерейін арттырып, ұстаздардың сенімінен шығып, киелі қара шаңырағымыздың үмітін ақтарына бек сенеміз.

                                                                                                         Филология, әдебиеттану     

                                                                                                  және әлем тілдері факультеті

                                                                                                  мемлекеттік тіл кафедрасы

                                                                                                           меңгерушісінің ғылыми-инновациялық               

                                                                                    жұмыс және халықаралық 

                                                                                      ынтымақтастық жөніндегі 

                                                                                           орынбасары

                                                                                                               ф.ғ.к., доцент Р.Қ.Өмірбекова