Кейде есер көңіл құрғырың,

Махаббат іздеп талпынар.

Ішем деп бейнет сусынын

Асау жүрек алқынар.

Тартқан бейнет, өткен жас

Жүректің отын сөндірмес.

Махаббат- mөмір көркі, рас,

Өлген соң ол да үндемес.

Махаббатсыз — дүние дос[1],

Хайуанға оны қосыңдар.

Қызықтан өзге қалсаң бос,

Қатының, балаң, досың бар.

Жүрегі жұмсақ білген құл

Шын дос таппай тыншымас.

Пайда, мақтан бәрі — тұл,

Доссыз ауыз тұшымас.