Менің сырым, жігіттер, емес оңай,

Ешкімнің ортағы жоқ, жүрсін былай!

Нені сүйдім, дүниеде неден күйдім,

Қазысы оның — арым мен бір-ақ құдай.

Жүрегім екеуіне жалбарынар,

Рақымдық пен әділ сор деп жалынар.

Мен тентек пе, түбінде кім жазалы,

Қайғыны жіберуші өзі сынар.

Надандар былшылдайды, құп алмайды,

Үлкен жанның қиялын ұға алмайды.

Теңізден таудай толқын соқса-дағы,

Жағадағы жартасты жыға алмайды.

Құдай мыкты жаратқан үлкен жартас,

Былш-былш еткен бет бұрып судан қайтпас.

Бұлытта суық дауыл, жаймен сырлас,

Өзгені жан екен деп сырын айтпас.